Руското Министерство за одбрана соопшти дека во текот на ноќта меѓу четвртокот и петокот системите за противвоздушна одбрана пресретнале и уништиле вкупно 660 украински беспилотни летала, што претставува еден од најголемите регистрирани напади од почетокот на војната.
Според руските власти, дроновите биле соборени над повеќе од десет региони, меѓу кои Московската област, анектираниот Кримски Полуостров, како и над акваториите на Црното и Азовското Море.
Градоначалникот на Москва, Сергеј Собјанин, изјави дека најмалку 47 дронови биле пресретнати додека се движеле кон руската престолнина.
„Екипите на итните служби се на терен и работат на местата каде што паднале остатоците од дроновите“, напиша Собјанин на Телеграм, без да соопшти информации за евентуални жртви или материјална штета.
Масовен напад бил регистриран и во Тулската област, која се наоѓа на околу 180 километри јужно од Москва. Гувернерот на регионот, Дмитриј Милаев, информираше дека е оштетена една приватна куќа во округот Шчекино, а една жена се здобила со повреди.
Во последните месеци Украина значително ги интензивира нападите со беспилотни летала со долг дострел врз руска територија, со посебен акцент на енергетската инфраструктура. Минатата недела украински напад предизвика голем пожар во рафинерија за нафта југоисточно од Москва.
Украинскиот претседател Володимир Зеленски во четвртокот изјави дека одобрил 40-дневна кампања насочена кон руски цели, со цел да се изврши дополнителен притисок врз Москва за прекин на воените дејствија.
