Украина соопшти дека по вторпат за нешто повеќе од една недела извршила напад врз рускиот центар за сателитски комуникации „Дубна“, кој се наоѓа северно од Москва.
Според украинскиот претседател Володимир Зеленски, објектот, кој се наоѓа на околу 500 километри од украинската граница, се користи за разузнавачки активности и координација на руските вооружени сили ангажирани во војната во Украина.
Руските власти засега официјално не потврдија дека комуникацискиот центар бил погоден. Сепак, гувернерот на Московската област, Андреј Воробјов, изјави дека дрон погодил административна зграда во градот Дубна, при што немало жртви.
Во меѓувреме, Воробјов соопшти дека во напад со дрон врз семејна куќа во Московската област загинало шестмесечно бебе. Според него, спасувачките екипи извлекле две возрасни лица и две деца од урнатините, но бебето починало на пат кон болница.
Градоначалникот на Москва, Сергеј Собјанин, изјави дека руската противвоздушна одбрана соборила повеќе од 60 дронови во неколку бранови напади врз главниот град. Од руското Министерство за одбрана, пак, соопштија дека вкупно биле пресретнати или уништени 419 беспилотни летала.
Украинските напади се дел од стратегијата на Киев за засилување на притисокот врз Кремљ преку удари длабоко на руска територија, при што сè почести цели се енергетската инфраструктура и воените објекти.
Кремљ ги осуди нападите, а портпаролот Дмитриј Песков изјави дека во нив страдаат цивили и деца.
