(Видео) Русија: Во украински напад врз одморалиште загинаа 11 лица, меѓу нив четири деца

Руските власти соопштија дека во текот на ноќта 11 лица, меѓу кои и четири деца, загинале во украински напад врз туристичкото место Кириливка, во делот од Запорошката област што е под руска контрола. Во нападот биле повредени уште 16 лица.

— реклама —

Гувернерот на регионот, поставен од Москва, Евгениј Балицки, ја обвини Украина дека намерно гаѓала цивили, тврдејќи дека нападот бил извршен врз одморалиште на брегот на Азовското Море, во близина на Мелитопол. Од украинска страна засега нема официјален коментар за овие тврдења.

Во меѓувреме, Украина соопшти дека нејзините беспилотни летала погодиле руска нафтена платформа во Каспиското Море, како и рафинерија во сибирскиот регион Тјумењ. Според украинската Служба за безбедност, цел на нападот била платформата „Филановски“, која е во сопственост на компанијата „Лукоил“.

— реклама —

Локалните власти во Тјумењ потврдија дека во нападот избувнал пожар во рафинеријата, но не соопштија дали производството е прекинато.

— реклама —

Украинската служба за безбедност соопшти и дека биле нападнати два товарни брода во Каспиското Море, за кои тврди дека биле користени за транспорт на воена опрема меѓу Русија и Иран.

Од друга страна, руското Министерство за одбрана информираше дека нивни беспилотни летала погодиле брод во Црното Море, за кој тврдат дека превезувал воена опрема за украинската армија. Министерството наведе и дека биле извршени напади врз украински логистички центри, објекти за производство и складирање беспилотни летала, како и врз енергетска, транспортна и пристанишна инфраструктура.