(Видео) Руски дрон удри во мост во Киев додека по него се движеа автомобили

Руски дрон го погоди Северниот мост во Киев додека по него се одвивал сообраќај, а на социјалните мрежи се појавија драматични снимки од моментот на ударот. Градоначалникот на украинската престолнина, Виталиј Кличко, потврди дека е погоден коловозот и дека итните служби се упатиле на местото.

На снимките се гледа експлозија на мостот во непосредна близина на автомобили кои во тој момент се движат по него, по што дел од возачите продолжуваат низ чадот и огнот.

Засега нема официјална потврда за загинати или повредени во денешниот удар.

— реклама —

Ова е втор руски напад врз Северниот мост за два дена. Во вчерашниот удар беа повредени две лица, а беа оштетени коловозот и контактната мрежа за тролејбусите.

Нападите доаѓаат во период кога руските сили сè почесто ги гаѓаат клучните мостови преку Днепар што ги поврзуваат источниот и западниот дел на Киев. Претходно во повеќе наврати беше напаѓан и Јужниот мост, што предизвикуваше прекини и пренасочување на сообраќајот.

— реклама —

Мостовите имаат големо значење за секојдневното функционирање на украинската престолнина, бидејќи голем број жители секојдневно го преминуваат Днепар. Дури и ограничените оштетувања можат да предизвикаат сериозни сообраќајни и логистички проблеми без самата конструкција на мостот да биде урната.

Воздухопловниот експерт и поранешен инженер во „Антонов“, Константин Криволап, за „Kyiv Post“ оцени дека со експлозивното полнење на ваквите дронови практично не може да се урне мост од овие размери.

— реклама —

„Да се уништи ваков мост со експлозивно полнење од 50 килограми е практично невозможно. За мост од оваа големина таквите удари се како убод од комарец“, изјави Криволап.

Според неговата процена, целта е нарушување на логистиката, парализирање на движењето и создавање психолошки притисок врз населението.

Интензивирањето на руските напади врз инфраструктурата се случува пред зимата, додека украинските власти предупредуваат на можни нови удари врз електроенергетскиот систем, греењето и водоснабдувањето.

— реклама —

Во Киев денеска пристигна и германскиот канцелар Фридрих Мерц, кој најави дополнителна поддршка за Украина. Според германски владини претставници, пакетот вклучува една милијарда евра воена помош и 350 милиони евра за санација на енергетскиот сектор, а се очекува и финализирање договор за заедничко производство на повеќе видови беспилотни летала.

„Ако Русија не биде запрена, порано или подоцна нејзината воена машинерија ќе се сврти против нас“, изјави Мерц по пристигнувањето во Киев.

Новата серија напади следува и неколку дена откако претседателот Володимир Зеленски соопшти дека Украина првпат во борбени услови ја употребила домашната тактичка балистичка ракета FP-7, произведена од украинската компанија „Fire Point“.