(Видео) Руски напад тешко оштети голем магацин за лекови во Украина: Штетата се проценува на десетици милиони евра

Голем логистички комплекс за складирање лекови во Киевската област бил тешко оштетен во рускиот напад во текот на ноќта. Станува збор за комплексот на компанијата „Биокон“ во Бориспилскиот округ, потврди началникот на Киевската областна воена управа, Тимур Ткаченко, пренесува „Украинска правда“.

Според извори од фармацевтскиот сектор, цитирани од „Економична правда“, погоден бил токму комплексот на „Биокон“, кој е меѓу најголемите специјализирани складишта за лекови во Украина.

— реклама —

Соговорниците проценуваат дека материјалната штета од нападот би можела да достигне неколку милијарди украински гривни, односно најмалку неколку десетици милиони евра.

— реклама —

Компанијата „ХФК Биокон“ се занимава со фармацевтска логистика и складирање медицински производи. Во нејзините простории странски фармацевтски компании изнајмуваат магацински простор за лекови, а компанијата обезбедува и услуги за складирање медицински производи во царински магацин.

Русија во изминатите недели значително ги засили нападите врз складишта и логистичката инфраструктура во Киевската област.

— реклама —

На 27 август, руски напад во истиот округ предизвика голем пожар во магацински објекти.

Во текот на последната ноќ, руските сили, според украинските власти, извршиле напад со 163 ударни беспилотни летала врз Украина. Украинската противвоздушна одбрана соопшти дека соборила 135 од нив.