(Видео) Руски воен хеликоптер останал без гориво и принудно слетал на пат на Сахалин

Руски воен хеликоптер „Ми-8“ принудно слетал на пат на островот Сахалин, на рускиот Далечен Исток, при што по неуспешниот обид за слетување завршил во канал покрај коловозот.

Според информациите на телеграм-каналот „Fighter-bomber“, кој се поврзува со руското воено воздухопловство, хеликоптерот во текот на летот останал без гориво, поради што откажале двата мотори. Екипажот бил принуден итно да се спушти на јавен пат.

— реклама —

Обидот за слетување на асфалтот, сепак, не поминал без проблеми. При маневрот, лопатките на роторот зафатиле дрвја покрај патот, по што леталото ја загубило насоката и завршило во каналот покрај коловозот.

— реклама —

Засега нема официјални информации за состојбата на членовите на екипажот, ниту за евентуално загинати или повредени лица.

„Ми-8“, познат под ознаката „Хип“ во класификацијата на НАТО, е советски двомоторен повеќенаменски хеликоптер развиен во 1960-тите. Со повеќе од 17.000 произведени примероци во различни верзии, се смета за најпроизведуваниот хеликоптер во историјата.

— реклама —

Првично бил наменет за транспорт на до 24 војници или четири тони товар, но со текот на времето бил приспособуван и за медицинска евакуација, извидување, гаснење пожари и борбени задачи. Одредени верзии можат да носат ненаведувани ракети, митралези и противтенковски ракети.

Благодарение на робусната конструкција, релативно едноставното одржување и способноста за работа во екстремни климатски услови, „Ми-8“ со децении се користи во воените и цивилните служби во повеќе од 50 земји, вклучително и во Русија.