Соединетите Американски Држави во текот на ноќта извршија нов бран воздушни напади врз воени цели во Иран, додека Техеран возврати со ракетни напади и напади со беспилотни летала кон Јордан, Бахреин и Кувајт, што дополнително ги засили стравувањата од проширување на конфликтот на Блискиот Исток.
Според соопштението на Централната команда на САД (ЦЕНТКОМ), ова е деветта последователна ноќ на американски операции. Наведено е дека биле погодени воени командни центри, системи за воздушна одбрана и крајбрежен надзор, локации за лансирање ракети и дронови, како и комуникациски мрежи.
Од ЦЕНТКОМ соопштија дека операциите ќе продолжат со цел да се намалат иранските воени капацитети кои, според американската страна, се користат за напади врз трговски бродови и цивилни морнари што пловат низ Ормускиот Теснец.
Иранската новинска агенција Тасним објави дека експлозии биле регистрирани во Тебриз, Чабахар, Конарак, Махшар и во пристаништето Бандар Имам Хомеини.
Како одговор на американските напади, Техеран изврши напади кон земји во кои се наоѓаат американски воени бази. Кувајт соопшти дека неговата противвоздушна одбрана пресретнала беспилотни летала лансирани од Иран, додека сирени за воздушна опасност се огласиле и во Бахреин.
Американската војска, исто така, соопшти дека еден американски војник загинал во Ирак при контролирана експлозија на соборен ирански дрон. Според официјалните информации од Вашингтон, од почетокот на актуелниот конфликт загинале 17 припадници на американските вооружени сили.
Во меѓувреме, Британската организација за поморска трговија (УКМТО) извести дека брод се запалил во Ормускиот теснец, на околу осум наутички милји северозападно од Кумзар во Оман. Причината за пожарот засега не е позната, а организацијата ги повика сите бродови што пловат низ областа да бидат крајно внимателни.
Поради најновата ескалација, САД распоредија дополнителни борбени авиони и авиони за воздушно полнење гориво на Блискиот Исток, јавуваат американските медиуми.
Информациите за воените операции и нивните последици доаѓаат од официјални американски и ирански извори и не можат независно да бидат целосно потврдени.
