(Видео) САД изврши рација врз „ничиј брод“, тврдат дека е поврзан со Иран

Американското Министерство за одбрана соопшти дека неговите сили во текот на ноќта извршиле интервенција и заплена на бродот „М/Т Тифани“ во Индо-пацифичкиот регион. Според официјалното соопштение, акцијата поминала без инциденти и без отпор од екипажот.

— реклама —

Во Вашингтон наведуваат дека овој потег претставува засилување на контролата врз поморските рути, при што се таргетираат пловила за кои постои сомневање дека, и покрај меѓународните санкции, се користат како логистичка поддршка на Иран.

— реклама —

Американските власти го опишуваат бродот „М/Т Тифани“ како пловило без државна припадност, што во поморското право значи дека не плови под знамето на ниту една признаена држава или дека неговата регистрација е неважечка. Според нив, токму вакви пловила често се користат во таканаречената „флота во сенка“, со цел да се избегне надзор и да се овозможи транспорт на нафта или материјали кои подлежат на ограничувања.

Пентагон наведува дека американските сили го искористиле правото на проверка на брод, меѓународен правен механизам кој овозможува запирање и контрола на пловило на отворено море кога постои основано сомневање за неговиот статус или за можни незаконски активности. Од таму додаваат дека сите дејствија биле спроведени во согласност со меѓународните правила.

— реклама —

Американските власти испратија порака дека ќе продолжат со операциите насочени кон сузбивање на мрежите кои, според нив, ја поддржуваат заобиколувањето на санкциите против Иран, без оглед на локацијата на пловилата. Во соопштението се нагласува дека меѓународните води не смеат да се користат како засолниште за санкционирани бродови и дека ќе се продолжи со ограничување на нивното движење во поморскиот простор.