(Видео) „СДСМ бара привремена забрана за вршење должности на Трајко Славески и останатите во НБРМ за Алта банка“, вели Димитријевиќ

СДСМ бара привремено отстранување од должност на гувернерот на Народната банка, Трајко Славески, и на другите инволвирани во случајот со Алта банка, откако партијата поднесе кривична пријава против нив. Барањето, како што соопшти генералниот секретар Александар Саша Димитријевиќ, има цел да спречи можно влијание врз сведоците и уништување на документацијата.

— реклама —

Димитријевиќ на прес-конференција истакна дека СДСМ бара обвинителството да ја прибере целокупната документација за преземањето на Алта банка во Македонија, вклучително и стручните елаборати, записниците, дадените согласности и комуникацијата со домашните и странските институции. Партијата бара и проверка на прекуграничните трансакции, како и сослушување на сите лица што учествувале во одлучувањето и надзорот.

— реклама —

Од СДСМ наведуваат дека со кривичната пријава бараат да се испита дали биле проверени угледот на сопственикот, потеклото на капиталот и можните ризици за сигурноста и стабилноста на банката.

Димитријевиќ упати повик до обвинителот Ненад Саевски да постапува независно и без политички притисоци, оценувајќи дека треба да се утврди одговорноста на сите што учествувале во процесот на преземање и одобрување на Алта банка.

— реклама —

Партијата тврди дека станува збор за сериозен финансиски скандал и најави дека ќе бара одговорност од сите инволвирани.

— реклама —