Утринава околу 5 часот, пожар избувна пред влезот на нова станбена зграда во скопската населба Кисела Вода, предизвикувајќи паника меѓу станарите, кои биле разбудени од силни звуци и во страв ги напуштале своите домови.
Според сведоштво на жител од зградата „Трим и Лум“, првите експлозии се слушнале околу 5:20 до 5:30 часот, по што соседите почнале да тропаат и да ѕвонат по становите за сите веднаш да излезат надвор.
„Видеото е направено утрово околу 6 часот. Првото пукање беше околу 5:20-5:30 часот. Направена е нова трафостаница до нашата зграда и се пуштени каблите, но ги оставиле под висок напон. Според инспекторите, поради дождот што врнел ноќеска дошло до пожарот“, вели жителот.
Тој додава дека, за среќа, нема повредени лица.
„Среќа што нема никој повреден. Сите навреме излеговме надвор. Се тропаше и се ѕвонеше по становите за веднаш да се излезе“, раскажува очевидецот.
Од Министерството за внатрешни работи информираат дека пожарот бил пријавен во 05:45 часот.
„Денеска (12.06.2026) околу 05:45 часот во СВР Скопје било пријавено дека на бул. „Борис Трајковски“ настанал пожар во орман на ЕВН, при што изгореле кабли. Пожарот е изгаснат од Бригадата за противпожарна заштита Скопје. Се преземаат мерки за утврдување на причините за настанувањето на пожарот и за расчистување на случајот“, соопштија од МВР.
Во меѓувреме, станарите велат дека зградата останала без електрична енергија и бараат итна реакција од надлежните институции, целосно расчистување на случајот и утврдување на одговорноста за инцидентот што, како што велат, можел да заврши многу потрагично.
