(Видео) Сеута не мирува: Илјадници мигранти и натаму на улиците

Шпанските власти префрлиле 864 мигранти во новиот привремен прифатен центар „Лос Росалес“ во Сеута, каде што ја поминале првата ноќ, додека илјадници други и натаму престојуваат на улиците на шпанската енклава.

Мигрантите во неделата наутро биле префрлени од локацијата Лома Колменар, оддалечена околу 1,5 километри. Во наредните денови ќе останат во центарот, каде што треба да бидат регистрирани и индивидуално проценети нивните случаи.

— реклама —

Шпанското Министерство за миграции и инклузија најавува дека постапката за нивна тријажа треба да започне наскоро. Владата очекува во следните недели да обезбеди до 6.000 места за мигранти, додека во моментов се достапни и функционални околу 4.300.

— реклама —

Мигрантите кои се префрлени во „Лос Росалес“ пристигнале во Сеута на 30 јули, за време на масовниот влез во енклавата. По околу месец и половина поминати на отворено, тие ја поминале првата ноќ во привремено засолниште.

На влезот во центарот биле поставени неколку полициски контролни пунктови, каде што службениците ја проверувале облеката, торбите и личните работи на мигрантите.

Центарот, со капацитет од 864 лица, бил исполнет за помалку од два часа. Стотици мигранти останале надвор, чекајќи решение бидејќи немаат каде да заминат. На локацијата се поставени шатори, кревети на кат и подвижни тоалети.

— реклама —

Шпанската влада наведува дека приоритет е завршувањето на процесот на регистрација, по што секој случај ќе биде разгледан одделно.

Во меѓувреме, на локации како плажите Трамполи и Бенитез и натаму можат да се видат десетици импровизирани засолништа во кои престојуваат мигранти.