Најмалку шест лица загинаа, а околу 90 се повредени во руски напад со дронови врз трговски центар во Криви Рих, Украина, при што втор проектил ги погодил спасувачките екипи додека траела акцијата за извлекување на настраданите.
Меѓу повредените има и шест деца, а според регионалниот гувернер Олександр Ханжа, 21 лице е во тешка состојба, меѓу кои и едно дете.
По првиот напад избил голем пожар во објектот, а густ црн чад со часови се издигнувал над градот додека пожарникарите се обидувале да го локализираат огнот. Вториот дрон удрил околу половина час по првиот напад, токму во моментот кога спасувачките екипи работеле на теренот.
Украинскиот претседател Володимир Зеленски го осуди нападот, оценувајќи дека вториот удар бил насочен кон медицинските и противпожарните тимови. Тој порача дека станува збор за „терористички чин“ и побара од меѓународната заедница да изврши дополнителен притисок врз Москва.
Криви Рих е родниот град на Зеленски и често е цел на руски воздушни напади. Нападот врз трговскиот центар се случил во текот на денот, кога објектот бил полн со посетители.
