(Видео) Шпанија парализирана: Четири милиони работници на генерален штрајк, судири со полицијата и десетици приведени

Шпанија денеска е зафатена со генерален штрајк, прв од ваков обем по 14 години, со кој работниците и синдикалните организации бараат решавање на кризата со домувањето, повисоки плати и подобрување на животниот стандард.

Протестот предизвика нарушувања во транспортот, индустријата и јавните услуги, а во повеќе градови дојде и до судири меѓу демонстрантите и полицијата.

Според проценките на синдикатите, околу четири милиони работници учествувале во штрајкот. Организаторите посочуваат дека незадоволството од недостапноста на становите, високите трошоци за живот и недоволната куповна моќ се главните причини за мобилизацијата.

— реклама —

Еден од најголемите ефекти од штрајкот е забележан во Каталонија, каде што јавниот транспорт беше сериозно ограничен. Според „Ел Паис“, железничкиот и автобускиот сообраќај, како и метрото во Барселона, беа прекинати во дел од денот согласно утврдените минимални услуги.

На аеродромот Барселона-Ел Прат биле откажани 85 од планираните 734 летови, додека блокади и прекини имало и на повеќе важни патни автопати.

— реклама —

Протестите се почувствуваа и во индустриските центри, пристаништата и логистичките капацитети. Синдикатите тврдат дека во одделни индустриски сектори одзивот бил особено висок.

Штрајкот не помина без инциденти. Шпанската јавна телевизија објави дека до попладневните часови биле регистрирани 42 приведувања во различни делови од земјата.

— реклама —

Инциденти имало во близина на големи пазари, автобуски депоа и индустриски зони. Во Мадрид, полициски интервенции со употреба на солзавец предизвикале повредени и лица на кои им била потребна медицинска помош.

— реклама —

За разлика од традиционалните штрајкови кои најчесто се фокусираат на платите и работничките права, денешната мобилизација во Шпанија во голема мера е насочена кон сè потешкиот пристап до пристојно и финансиски достапно домување.

Синдикатите и организациите за правата на станарите бараат конкретни мерки за намалување на притисокот врз домаќинствата, подобра заштита на закупците и повисоки приходи за работниците.

Штрајкот се одржува во чувствителен политички момент, помалку од три недели пред парламентарните избори закажани за 29 ноември, што му дава и дополнителна политичка тежина на незадоволството.