Американската тенисерка Аманда Анисимова го привлече вниманието на тенискиот свет за време на мечот против Александра Еала на турнирот во Синсинати, но овојпат не поради нејзината игра. Во еден момент таа од својата торба извади чаша со напиток кој на телевизиските гледачи им заличи на пиво.
Ситуацијата веднаш ги заинтригира и коментаторите. Брет Хабер ја праша Линдзи Девенпорт што пие Анисимова, на што таа претпостави дека можеби станува збор за јаболков сидер.
„Никогаш не би рекол дека тенисерка пие пиво среде меч, но дефинитивно така изгледа“, коментираше Хабер.
„Никогаш немам видено вакво нешто“, додаде Девенпорт.
На социјалните мрежи веднаш започнаа шпекулации. Некои сметаа дека станува збор за пиво, други за ѓумбиров напиток или безалкохолно пиво, додека дел од навивачите претпоставуваа дека пиела „Ред бул“. Алкохолни пијалаци не се дозволени за време на мечевите, па мистеријата дополнително го привлече вниманието.
Подоцна било потврдено дека мистериозниот напиток навистина бил „Ред бул“. Информацијата ја потврдил оператор на камерите покрај теренот, според кој Анисимова побарала токму таков напиток.
Анисимова, во меѓувреме, успеала да направи пресврт против Еала. Откако го загубила првиот сет, ги освоила следните два и славела со 4:6, 6:4, 6:2.
