(Видео) Што се случува зад камерата кога светот е во хаос? Новинарот Александар Видиновски открива во својата прва книга

Од вооружените судири во Диво Насеље, преку обидот за државен удар во Турција, до војната во Украина – новинарот Александар Видиновски ги преточи своите искуства од терен во првата книга „Од местото на настанот“, која беше промовирана пред публика.

Книгата носи приказни за новинарските предизвици, ризиците и одлуките што се носат во моменти кога камерите ги снимаат настаните што го привлекуваат вниманието на светската јавност. Но, за разлика од телевизиските прилози, Видиновски овојпат раскажува што се случувало зад камерата, како ги доживувал настаните и со какви ситуации се соочувал додека известувал.

— реклама —

View this post on Instagram

„Најчесто јас сум тој што зборува за другите, појавите и луѓето, ова е ново искуство за мене. Самата книга, наједноставно кажано, во својата кариера, имав среќа или несреќа да преживеам и да просведочам, да известувам за некои настани кои имаа големо и светско значење. Но и некои одредени локални прашања за нас“, рече Видиновски на промоцијата.

Тој објасни дека идејата за книгата произлегла од разговорите со пријателите, кои често го поттикнувале да ги раскажува случувањата на кои бил сведок.

— реклама —

„Пријателите ме тераа да ги раскажам тие настани од книгата. Па добив идеја, наместо да раскажувам, да ги ставам во книга. Не дека Видиновски бил единствениот кој известувал за обидот за државен удар во Турција, туку повеќе, дека една македонска новинарска екипа беше на лице место и известуваше за настан кон кој беа свртени очите на светот“, истакна новинарот.

Особеност на изданието е што на крајот од секое поглавје има QR-код преку кој читателите можат да ги погледнат телевизиските прилози и да споредат како изгледале настаните во медиумските извештаи со она што авторот го доживеал на терен.

— реклама —

„Добивате една слика се тоа што се случува зад камерата, кога Александар ќе биде на терен. На крајот од секоја глава, имате QR код за да видите како изгледа тоа што се претставувало и се објавило во медиумот“, рече модераторот на промоцијата, Борислав Тноковски.

Тој прочита и дел од книгата во кој Видиновски ги опишува лекциите што ги научил известувајќи од различни кризни ситуации.

„Во Диво Насеље учев што значи адреналинот, во Турција ја почувствував улогата на сведокот. Кај Кожле ја видов границата на камерата. А пред Рејна одговорноста кон жртвите и екипата. Во Украина сите тие лекции мора да дејствуваат истовремено“, гласеше прочитаниот дел.

— реклама —

Промоцијата започна со музички настап на Зарина Првасевда и Дуке Бојаџиев, кои за првпат заедно настапија на сцена. Пред присутните изведоа три композиции во живо, од кои две дело на Бојаџиев.

Со „Од местото на настанот“, Видиновски на читателите им нуди поинаква перспектива за новинарската професија – не само преку она што јавноста го гледа на екраните, туку и преку личните искуства, неизвесноста и одговорноста што остануваат надвор од телевизискиот кадар.