Најмалку девет лица, меѓу кои осум бегалци од етничката заедница Рохинџа, загинаа во одрони на земјиште предизвикани од обилните монсунски дождови на југоистокот на Бангладеш.
Одроните се случиле во текот на ноќта во четири локации во бегалските кампови во Кокс Базар, каде што земјата затрупала привремени засолништа додека луѓето спиеле.
Спасувачките екипи извлекле седум тела, додека едно тело било пронајдено од самите бегалци. Полицијата соопшти дека загинал и еден државјанин на Бангладеш, откако одрон затрупал куќа.
Еден од преживеаните, Али Ахмед, изјавил дека во несреќата ги загубил своите родители и помладиот брат.
„Од Мјанмар избегавме во 2017 година за да се спасиме од прогон. Сега и овде останав без семејството и не знам што ме чека“, изјавил тој за Ројтерс.
Во пренатрупаните кампови во Кокс Базар, најголемото бегалско населено место во светот, живеат повеќе од еден милион Рохинџа кои во 2017 година побегнаа од Мјанмар. Поголемиот дел од засолништата се изградени од бамбус и пластични церади на стрмни падини, што ги прави особено ранливи на одрони и поплави за време на сезоната на монсуните.
Властите веќе евакуирале околу илјада бегалци од најризичните подрачја, а планираат да преселат уште неколку илјади лица, бидејќи метеоролозите најавуваат нови обилни врнежи во наредните денови.
Истовремено, обновените судири во мјанмарската држава Ракајн ја зголемуваат загриженоста дека нов бран бегалци би можел да се упати кон Бангладеш, поради што властите го засилија надзорот долж границата.
