(Видео) Силно невреме го погоди Загреб, откорнати покриви и прекинат трамвајски сообраќај

Силно невреме проследено со обилен дожд, град и силен ветер утрово го погоди Загреб, предизвикувајќи сериозни проблеми во сообраќајот и голема материјална штета.

— реклама —

Поради паднати дрвја и оштетена инфраструктура, биле прекинати повеќе трамвајски линии низ хрватската престолнина. Најголеми проблеми биле регистрирани на улиците Савска и Максимирска, каде што дрвја целосно го блокирале движењето на трамваите, додека во населбата Микулиќи проблеми предизвикал паднат електричен кабел.

Граѓани на социјалните мрежи објавуваат снимки од откорнати покриви, расфрлани ќерамиди и оштетени објекти, особено во населбата Шпанско, каде што ветерот бил најсилен.

— реклама —

Невремето претходно зафатило делови од Словенија, каде што во околината на Домжале паднал силен град, а во некои северни предели бил забележан и снег.

— реклама —

Метеоролозите предупредуваат дека истиот фронт попладне ќе ја зафати и Србија, каде што се очекуваат силни налети на ветер, обилни врнежи, грмежи и локален град. Во одредени делови од земјата се прогнозира ветер со брзина до 120 километри на час.

Властите во регионот апелираат граѓаните да бидат внимателни поради опасност од паднати дрвја, прекини во снабдувањето со електрична енергија и отежнат сообраќај.

— реклама —