(Видео) Силно невреме ја погоди Кина: Одрон затрупа десетици, најмалку осум загинати во бури

Спасувачките екипи во западниот дел на Кина продолжуваат со потрагата по најмалку 16 лица кои останаа затрупани по голем одрон на земјиште што се случи во планинскиот дел на покраината Гансу.

Според кинеските власти, од вкупно 33 лица кои биле заробени под одронот, досега успешно се извлечени 17. Претседателот на Кина, Си Џинпинг, нареди да се вложат максимални напори за спасување на затрупаните и за справување со последиците од несреќата.

— реклама —

Причината за одронот сè уште не е официјално утврдена, но тој се случува во период кога голем дел од Кина е погоден од екстремни временски услови.

— реклама —

Во централната покраина Хубеи, силните грмотевични бури што ја зафатија областа во понеделникот вечерта однесоа најмалку осум животи, додека по едно лице сè уште се трага. Во невремето се повредени најмалку 275 лица, а во неколку градови се регистрирани удари на ветер со брзина до 149 километри на час.

— реклама —

Метеоролошките служби предупредуваат дека во наредните 24 часа се очекуваат нови обилни врнежи во повеќе делови од земјата, каде што живеат околу 200 милиони луѓе. Во некои региони се прогнозираат и до 260 милиметри дожд, што дополнително го зголемува ризикот од нови одрони и поплави. За одредени подрачја се издадени и предупредувања за можна појава на торнада.

Истовремено, Кина е во состојба на зголемена подготвеност поради приближувањето на супертaјфунот Бави, кој се движи преку Тихиот Океан кон Тајван. Според американската Национална метеоролошка служба, тајфунот веќе поминал над неколку пацифички острови со ветрови што достигнувале брзина до 290 километри на час.