Поројниот дожд што денеска го зафати Скопје повторно предизвика поплавени улици и подвозници, а една несекојдневна сцена го привлече вниманието на граѓаните.
На видеоснимка што се споделува на социјалните мрежи се гледа жител кој, наместо да ја заобиколи насобраната вода, решил да ја искористи ситуацијата на поинаков начин. Со гумен душек тој буквално плови низ поплавениот подвозник, додека присутните ја снимаат необичната глетка.
Снимката за кусо време стана хит на социјалните мрежи, а бројни корисници низ шега коментираат дека „за некого Скопје е Грција кога ќе заврне пороен дожд“.
Иако видеото предизвика насмевки, повторно го отвори прашањето за хроничниот проблем со поплавувањето на дел од скопските сообраќајници при секој посилен дожд. Подвозниците и улиците на повеќе локации и овојпат останаа под вода, што предизвика проблеми во сообраќајот и за возачите и за пешаците.
