Филип Ѓоргиев, кој стои зад профилот „Кеса на 10“, спроведе нова еколошка акција во Скопје. Овојпат тој темелно исчисти автобуска станица, користејќи ракавици и крпа.
Ѓоргиев редовно организира акции за собирање отпад на различни локации низ Македонија. Досега чистел во повеќе градови, меѓу кои и во Виница, а собираше отпад и од дното на Охридското Езеро.
Преку иницијативата „Кеса на 10“, тој се обврза да собере по една кеса отпад за секои десет следбеници на „Инстаграм“. Неговиот профил има повеќе од 31.000 следбеници, а досега се собрани над 3.000 кеси со отпад.
Со своите акции, Ѓоргиев настојува да ја подигне јавната свест за правилното одлагање на отпадот и за одговорното однесување кон животната средина.
