„Спејс екс“ го прекина лансирањето на ракетата „Старшип“ непосредно пред полетувањето, откако дел од моторите не се активирале. Компанијата најави дека нов обид ќе биде направен во наредните денови.
Ракетата требаше да полета од лансирниот комплекс „Старбејс“ во јужен Тексас, но во последните секунди пред лансирањето беше активиран автоматски систем за прекин на мисијата. Од лансирната рампа се појавија облаци чад, а леталото остана на земја.
Основачот и извршен директор на „Спејс екс“, Илон Маск, изјави дека проблемот со моторите предизвикал автоматско предупредување, по што започнала постапката за празнење на горивото.
„Ќе го анализираме инцидентот заедно со инженерските тимови, ќе утврдиме што се случило и ќе одлучиме кога ќе биде следниот обид за лансирање“, изјави менаџерот за комуникации на компанијата, Ден Хуот.
Иако ваквите одложувања не се невообичаени во вселенската индустрија, ова претставува нов удар за програмата „Старшип“, која има клучна улога во плановите на „Спејс екс“ за проширување на мрежата „Старлинк“, идните мисии до Месечината и Марс, како и развој на нови вселенски инфраструктури.
Развојот на „Старшип“ досега беше проследен со повеќе експлозии, технички дефекти и одложувања, а ова требаше да биде првата голема тест-мисија по јунската иницијална јавна понуда (ИПО) на компанијата.
По прекинатото лансирање, акциите на „Спејс екс“ забележаа пад од повеќе од шест проценти на платформата „Блу оушн“. И покрај тоа, аналитичарите и натаму остануваат оптимисти за долгорочните перспективи на компанијата.
„Старшип“ е замислен како целосно повторно употреблива ракета, при што и засилувачот „Супер хеви“ и вселенското летало треба по секоја мисија безбедно да се вратат на Земјата и повторно да бидат подготвени за лет.
„Спејс екс“ има договори со НАСА, вредни околу четири милијарди долари, за превоз на астронаути до Месечината, најрано во 2028 година. За исполнување на таа цел, компанијата ќе треба успешно да реализира серија сложени тестови, вклучително и полнење гориво во орбитата и повеќекратни последователни лансирања, пред „Старшип“ да биде сертифициран за превоз на луѓе.
