(Видео) Стотици змии, меѓу нив и отровни кобри, ги преплавија улиците по поплавите во Кина

Стотици змии, меѓу кои и отровни видови, се појавија на улиците на кинескиот град Хенгџоу по обилните дождови и катастрофалните поплави предизвикани од тајфунот Мајсак, објавија кинеските државни медиуми.

Според досегашните информации, во поплавите загинале најмалку 39 лица. Меѓу жртвите е и жена за која постои сомневање дека починала откако била касната од кобра што избегала од една од поплавените фарми за змии. Регистрирани се и повеќе случаи на каснувања од змии.

— реклама —

На социјалните мрежи се појавија вознемирувачки снимки на кои се гледаат змии како пливаат низ поплавените улици, со главите над површината на водата.

— реклама —

По првичните проценки дека ризикот е мал, локалните власти почнаа да издаваат предупредувања до населението, ангажираа специјални тимови за фаќање змии, обезбедија дополнителни количини противотров и ги подготвија болниците за можни нови случаи.

Освен змии, поплавите довеле и до бегство на повеќе животни од приватна зоолошка градина, меѓу кои зебри, ноеви, емуа, магариња, минијатурни коњи, ракуни и грбав вол. Сопствениците предупредија дека исплашените животни можат да бидат опасни.

Во поплавите се удавиле и три лава, а водената стихија однела повеќе од 16.000 свињи, кои спасувачките екипи ги извлекувале со тешка механизација.

— реклама —

Хенгџоу, во автономниот регион Гуангси, е познат како еден од најголемите центри за одгледување змии во Кина. Во регионот живеат повеќе од 100 видови змии, а до 2020 година таму имало речиси 20 милиони одгледувани змии на повеќе од 14.000 фарми, најчесто за потребите на фармацевтската и биомедицинската индустрија.

Според локалните служби, само во изминатите два дена биле фатени меѓу 2.000 и 3.000 змии, од кои најголемиот дел биле неотровни. Властите ги повикаа граѓаните да избегнуваат движење во текот на ноќта, како и престој во висока трева и во близина на водени површини, каде што змиите најчесто се засолнуваат по поплавите.