(Видео) Страшна трагедија во Кина: Најмалку 82 загинати во експлозија во рудник

Најмалку 82 лица загинаа во експлозија на гас во рудник за јаглен во градот Чангџи, во кинеската провинција Шанси, јави кинеската државна телевизија CCTV.

Локалните власти соопштија дека одговорните лица од компанијата „Тонџоу“, која управува со рудникот, се приведени.

— реклама —

Според последните информации, уште девет лица се водат како исчезнати, додека 201 рудар бил безбедно извлечен на површината до утринските часови по локално време.

— реклама —

Спасувачката акција сè уште трае, а екипите продолжуваат со интензивна потрага и работа на местото на несреќата.

Несреќата се случила во петокот во 21:43 часот по локално време во рудникот за јаглен „Лјушенју“ во округот Ќинјуан, каде во моментот на експлозијата под земја се наоѓале вкупно 247 работници.

— реклама —

Кинеската новинска агенција Синхуа пренесе дека кинескиот претседател Си Џинпинг наредил итна спасувачка акција и темелна истрага за причините за трагедијата.

Тој побарал да се вложат максимални напори за спасување на исчезнатите рудари, лекување на повредените и санирање на последиците од несреќата, како и утврдување на одговорност согласно законот.

Си Џинпинг нагласил дека властите низ цела Кина мора да извлечат поука од оваа несреќа и да ги засилат мерките за безбедност со цел да се спречат слични трагедии.