(Видео) Свлечиште во Кина затрупа куќи, најмалку две лица загинаа, а десет се исчезнати

Најмалку две лица загинаа, а десет се водат како исчезнати по свлечиште што погоди населено место во источниот дел на Кина, по обилните врнежи предизвикани од тајфунот Саудел.

Свлечиштето рано во саботата погодило дел од село во округот Суичуан, во провинцијата Џангси. Локалните власти веднаш испратиле спасувачки екипи на терен, а жителите биле преместени на побезбедно место поради опасност од нови одрони.

— реклама —

Според информациите, едно лице било извлечено од урнатините без знаци на живот, додека две лица биле спасени живи и се во добра состојба.

Државната телевизија CCTV објави дека спасувачите утрово пронашле уште едно безживотно тело меѓу урнатините на куќи. Потрагата по останатите исчезнати продолжува.

— реклама —

— реклама —

Свлечиштето е последица на обилните врнежи што ги донесе тајфунот Саудел, кој е 18-ти тајфун што ја погоди Кина годинава. Во четвртокот, Саудел по третпат стигнал до копното, овојпат во округот Џангпу во градот Џангџоу, во провинцијата Фуџијан. Поради предупредувањата за силен ветер и поројни врнежи, десетици илјади жители биле евакуирани.

Тајфунот погодил и 128.500 жители во 53 окрузи во соседната провинција Џангси, каде што речиси 8.700 луѓе биле итно евакуирани.

Спасувачките служби продолжуваат со пребарувањето на погоденото подрачје, додека властите ја проценуваат штетата предизвикана од невремето.