Правдата веќе три години никако да пристигне кај семејството Петровски. На 18.05.2019 скопски бизнисмен физички го нападнал Бранислав Петровски.
„Пред да се случи целиот настан тој дојде, лично да го побара нашиот семеен бизнис да му го отстапиме. Откако одбивме почнаа ситни притисоци и целата ситуација ескалираше со физички напад, од кои татко ми доби тешки телесни повреди, скршеница на череп, неколку скршеници а вилицата, скршеница на нос, крвен подлив на окото и така натаму“, вели синот Стефан Петровски, за Види вака.
Бизнисменот врз основа на признание на вина од страна на Кривичниот суд Скопје е осуден на три години условна казна.
„Случајот не заврши тука, откако ја призна вината, тој поднесе приватна кривична тужба кон моето семејство дека ние први сме го започнале физичкиот конфликт и ден-денеска се уште се влечеме низ судските лавиринти“, додава Стефан.
Тој вели дека тортурата продолжува, а напаѓачот поставил и камери за да снимаат. Се обратиле до Агенцијата за заштита на лични податоци и не добиле никаков одговор.
