Актерот Тони Михајловски, говорејќи по повод признанието што му беше доделено, се осврна на својата кариера, улогите што ги одиграл и на значењето на културата, нагласувајќи дека и покрај признанијата секогаш се обидувал да остане обичен човек.
„Никогаш не сум знаел да примам награди. Стално сум се прашувал со што јас сум ги заслужил овие награди. Меѓутоа, таква е мојата професија. Сите мои дилеми и сите мои двојби биле покриени со аплауз и верификувани со награди“, рече Михајловски.
Тој се пошегува и со карактерот на улогите што најчесто ги добивал, посочувајќи дека неговите ликови на филм често носеле имиња како Фазлија, Азем и Музафер. Михајловски истакна дека ретко играл Македонци на филм, но затоа низ театарот одиграл повеќе значајни македонски ликови.
Како една од улогите што му била особено важна ја посочи онаа на Кралот Марко, која, како што рече, била меѓу првите улоги што го пласирале на театарската сцена.
Михајловски им се заблагодари на оние кои го препознале неговиот досегашен труд и истакна дека му претставува чест што се нашол меѓу актерите кои во текот на неговата кариера му биле идоли и од кои учел.
„Секогаш се трудев и навистина ми е драго што сте го препознале тоа – да останам човек“, рече тој, раскажувајќи дека потекнува од работничко семејство, од татко тракторист и мајка домаќинка, а неговите корени се од Куклица.
Во продолжение, тој упати порака за значењето на културата и потребата од нејзино понатамошно градење и заштита.
„Да продолжите со културата што ја градите, имате света мисија, бидејќи културата значи да се штити и заштитува. Вие сте на одличен пат“, порача Михајловски.
Тој изрази надеж дека за две години, по повод 20-годишнината, повторно ќе се појави на сцената на паланечкиот театар, посакувајќи дотогаш да биде отворена нова театарска зграда.
„Дај Боже да го отворите, бидејќи навистина заслужувате. За две години, еве за дваесетгодишнина, нека имате своја театарска зграда, свој театар, свој ансамбл кој ќе се вика исто вака како што се вика фестивалот“, рече тој.
На крајот, Михајловски изрази надеж дека повторно ќе гостува со театарска претстава и ќе има можност да настапи пред публиката.
„Да сте ми живи и здрави. Се надевам дека ќе гостувам со театарска претстава, па да имате прилика да ме видите и на сцената. Уште еднаш ви се поклонувам“, порача актерот.
