Трагедија го потресе Тајланд откако гром удри на фудбалски терен за време на натпревар, при што загина 24-годишниот фудбалер Сафван Авае, а уште 12 играчи се здобија со повреди и изгореници.
Според медиумските извештаи, инцидентот се случил за време на регионалниот турнир „Голок куп“ на стадионот „Сантипап“ во провинцијата Наративат, каде што играле аматерски екипи од Тајланд и Малезија.
Драматична снимка го покажува моментот кога силен блесок од гром го осветлува теренот додека натпреварот се играл на силен дожд. По ударот избувнал пламен и се појавил облак од чад, по што играчите и гледачите во паника почнале да бегаат.
Авае останал без свест по ударот, а неговите соиграчи и присутните веднаш се обиделе да го реанимираат. Тој бил пренесен во болница во критична состојба, но подоцна им подлегнал на повредите.
„Иако медицинскиот тим направи сѐ за да му го спаси животот, жртвата им подлегна на тешките повреди“, изјавил началникот на полицијата Тун Сирихун.
Авае неодамна го исполнил својот сон потпишувајќи договор со полупрофесионалниот клуб ФК Јала, кој настапува во третата лига на Тајланд. Од клубот се простија од својот фудбалер со емотивна порака на социјалните мрежи.
Тајланд моментално се наоѓа во сезоната на монсуни, која носи чести грмежи, невреме и обилни врнежи низ целата земја.
