(Видео) Трамп кон новинарка: „Многу сте напорни“

Американскиот претседател Доналд Трамп се налути на новинарка на Еј-Би-Си њуз за време на разговор со новинари во претседателскиот авион Ер форс уан, додека одговараше на прашања за војната со Иран.

Новинарката го праша за фотографија од свечениот пречек на посмртните останки на американски војници загинати во судирите со Иран, која била искористена во електронска порака за собирање политички донации. На прашањето дали смета дека користењето на таква фотографија е соодветно, Трамп кратко одговори дека смета дека е.

— реклама —

Кога новинарката дополнително праша дали се собираат средства врз основа на загинатите војници, претседателот рече дека „не ја видел“ таа електронска порака. „Некој го објавува тоа. Многу луѓе работат за нас“, додаде тој.

— реклама —

Трамп потоа изјави дека „никој не е подобар кон војската од него“, по што ја праша новинарката за кој медиум работи. Кога таа одговори дека е од Еј-Би-Си њуз, тој остро ја нападна телевизијата.

„Еден од најлошите, најлажните и најкорумпираните... знаете што, Еј-Би-Си њуз – мислам дека можеби сте и најкорумпираната медиумска организација на планетата. Мислам дека сте ужасни“, изјави Трамп. Потоа му се обрати на друг машки новинар и му рече: „Вие сте многу подобри“.

— реклама —

Во текот на разговорот, претседателот стави прст на устата додека новинарката се обидуваше да постави уште едно прашање, додавајќи дека е „многу напорна личност“.

Новинарката претходно го праша и дали има коментар за шест американски војници кои загинале во напад со ирански дрон врз база во Кувајт. Додека таа го поставуваше прашањето, Трамп внимателно ја гледаше, а кога заврши нагло се сврте кон другите новинари.

— реклама —

„Повелете. Кој е следен?“, праша тој.

Подоцна, на својата социјална мрежа Трут соушл, Трамп објави неколку подолги објави во кои ги нападна медиумите поради начинот на известување за конфликтот со Иран, ги критикуваше судиите од Врховниот суд на САД кои гласале против неговите царини и го пофали водителот на Фокс њуз, Марк Левин.