(Видео) Трамп по масакрот врз Украинците: „Знаете, и руски цивили умираат.“

Американскиот претседател Доналд Трамп тврди дека Вашингтон и Москва се блиску до постигнување „голем, прекрасен договор“ кој нема да се однесува само на Украина, туку и на цела Европа. Тој откри дека во Белата куќа се сретнал со главниот преговарач на Кремљ, но не и со претставници на Украина.

Најавата отвора прашања за можноста за разговори за иднината на Украина без директно учество на украинската страна, што може да предизвика загриженост во Киев и европските престолнини.

Запрашан дали на средбата со рускиот претставник разговарал за нападите врз украински цивили и објекти како станбени згради, автобуси и училишта, Трамп потврдил дека ја отворил темата, но истовремено посочил дека и Русија има цивилни жртви.

— реклама —

„И другата страна убива, многу луѓе гинат. Двете страни заедно губат по 25.000 луѓе месечно. Тоа е крвопролевање и мора да заврши. Мислам дека наскоро ќе го завршиме“, изјави Трамп.

Во меѓувреме, Украина во последните месеци ги прошири нападите врз инфраструктура на руска територија, главно насочени кон енергетски објекти, центри за податоци и складишта што имаат значење за руските воени активности, објави „Вашингтон пост“. Наспроти тоа, руските сили во текот на војната редовно напаѓаат станбени згради, училишта и други цивилни објекти во Украина.

— реклама —

Еден од најтешките руски напади во последниот период се случил во понеделникот во селото Комишуваха, во Запорошката област. Од урнатините досега биле извлечени 43 тела, а се трага по уште 33 исчезнати лица.

Руските сили извеле повеќе воздушни напади врз селото, при што првично била погодена училишна зграда во која локалните жители се собрале за да добијат хуманитарна помош. Според објавените информации, била употребена и бомба ФАБ-3000, тешка три тони, со повеќе од 1.000 килограми експлозив и разорно дејство во радиус до 250 метри.

— реклама —

Украинскиот претседател Володимир Зеленски изјави дека по првото бомбардирање руските сили фрлиле уште девет воздушни бомби врз засолништето во кое луѓето се обидувале да најдат заштита. Тој го оцени нападот како исклучително страшен и посочи дека руските сили знаеле дека жителите редовно доаѓале таму за хуманитарна помош.

Меѓу загинатите се и двајца 44-годишни спасувачи, Денис Коноваленко и Олексиј Сушчевски, како и 53-годишниот воен болничар Олександр Зарјашчук од Житомир.

— реклама —

Според украинската Државна служба за вонредни состојби, спасувачките екипи и полицијата пристигнале на местото на нападот, но поради опасност од ново бомбардирање морале да се повлечат. Руските сили повторно го погодиле истото подрачје.

Зарјашчук служел како воен болничар од 2024 година, а по првите експлозии веднаш се упатил да им помогне на повредените. Неговата ќерка Александра Васкивска раскажала дека се обидувала да стапи во контакт со него, но не добивала одговор. Подоцна видела снимка на која нејзиниот татко се спушта во засолништето со други луѓе, непосредно пред вториот напад.