(Видео) Трамп со необична дефиниција за примирје: „Во Иран тоа значи да се пука поумерено“

Американскиот претседател Доналд Трамп предизвика нови реакции со својата изјава за значењето на примирјето во конфликтот меѓу САД и Иран, оценувајќи дека во тој дел од светот терминот има поинакво значење.

Одговарајќи на новинарско прашање во Белата куќа, Трамп изјави дека во Иран примирјето може да се сфати како „пукање на поумерен начин“, додавајќи дека ситуацијата на Блискиот Исток е различна од другите региони.

— реклама —

„Би рекол дека во тој дел од светот примирје е кога се пука поумерено“, изјави Трамп, предизвикувајќи смеа кај присутните членови на неговата администрација.

Неговите коментари доаѓаат во период на зголемени тензии меѓу Вашингтон и Техеран, откако Иран неодамна изврши напад врз аеродром во Кувајт, што дополнително ги искомплицира напорите за зачувување на кревкото примирје и продолжување на мировните разговори.

— реклама —

Трамп истакна дека и покрај последните воени дејствија, постои можност за постигнување договор меѓу двете земји во наредните денови.

— реклама —

„Слушам дека преговорите се одвиваат многу добро. Можно е договорот да биде постигнат до крајот на неделата, но ќе видиме што ќе се случи“, рече американскиот претседател.

Во меѓувреме, тој потврди и дека бил незадоволен од одредени потези на израелскиот премиер Бенјамин Нетанјаху, особено во врска со продолжувањето на воените операции во Либан, иако нагласи дека соработката меѓу двајцата лидери останува добра.

Изјавите на Трамп доаѓаат во време кога конфликтите на Блискиот Исток продолжуваат да создаваат неизвесност околу можноста за траен мир во регионот.