Три лица загинаа, а 13 се повредени, меѓу кои и деца, откако остатоци од беспилотно летало паднале во туристичкото место Архипо-Осиповка на рускиот брег на Црното Море, соопштија руските власти.
Местото административно припаѓа на Геленџик, едно од најпознатите летувалишта во Краснодарскиот Крај. Гувернерот на регионот, Венијамин Кондратјев, изјави дека украински дронови нападнале цивилна инфраструктура и дека службите за итни интервенции работат на локациите каде што се пронајдени остатоците од леталата. Овие тврдења засега не се независно потврдени.
На социјалните мрежи се појави видео на кое, според објавите, се гледа пад на дрон во близина на луѓе на плажа, по што следува експлозија.
Руските власти не потврдија дека дронот паднал директно меѓу капачите, туку наведоа дека жртвите настрадале од остатоците од беспилотното летало.
Според сведоштва што ги пренесуваат руските медиуми, дронови биле забележани во близина на плажата. Очевидци изјавиле дека луѓето се криеле зад карпи и лежалки, додека друг сведок раскажал дека видел повреден маж со крваво рамо.
Во текот на ноќта во Геленџик беше прогласена опасност од напад со дронови, а жителите пријавиле дека слушнале дејствување на противвоздушната одбрана.
Руското Министерство за одбрана соопшти дека меѓу вечерта на 2 август и утрото на 3 август биле пресретнати или уништени 131 украински дрон над повеќе руски региони, окупираниот Крим и Црното Море.
