Туристката Стеф, која досега има посетено 64 земји, тврди дека во Белорусија доживеала едно од најевтините патувања во Европа, откако оброк платила само едно евро.
За време на престојот таму, на Инстаграм ги споделила своите впечатоци и истакнала дека не ја изненадиле само ниските цени.
„Посетив една од најприфатливите земји во Европа, но она што најмногу се издвојуваше не беа цените. Тоа беше чувството дека сè е сосема различно“, објаснила таа во видео.
Стеф ги пофалила белоруските кина поради понудата која, како што вели, покажува поинакво културно влијание, додека улиците и метрото ги опишала како едни од најчистите што некогаш ги видела.
„Овде можете да јадете оброк за само едно евро и да се возите со автобус за само 25 центи. Но ова место не е само евтино, туку делува сосема различно од остатокот на Европа“, додала таа.
Историја, архитектура и советско наследство
Патничката особено ја воодушевила историјата на Белорусија.
„Може да ја видите насекаде околу себе, во архитектурата, спомениците и распоредот на градот, кои многу зборуваат за историјата на регионот“, рекла таа.
Главниот град Минск го опишала како „мал Париз“, со архитектура што потсетува на француски стил.
„Метрото е почисто од речиси секое место што сум го видела во Европа“, нагласила таа.
„Трагите од минатото се гледаат насекаде. Статуите на Ленин сè уште стојат, а згради и споменици од советската ера се на речиси секој агол. Дури имаат и најголема колекција на советски тенкови, ракети и проектили на отворено.“
Локални верзии на глобални брендови
Стеф им открила на своите следбеници дека во Белорусија нема „Мекдоналдс“, туку имаат своја верзија со поинакво име.
„Нивниот КФЦ е украсен со советски мурали, додека локалното население гледа руски и боливудски филмови наместо холивудски“, додала таа.
Заклучила дека имала чувство како да влегла во друг свет.
„Искрено, се чувствував како да сум влегла во друг свет, некаде помеѓу минатото и сегашноста. А најлудото од сè? Речиси никој не зборува за тоа.“
