Додека вниманието на светот е насочено кон застојот во мировните преговори и украинските напади врз руски рафинерии, сè поголема загриженост предизвикува северната граница на Украина со Белорусија, пишува „Киев Индепендент“.
Според анализата, Белорусија деновиве учествува во руски нуклеарни воени вежби, а украинскиот претседател Володимир Зеленски јавно предупреди дека постои опасност Минск директно да се вклучи во војната на страната на Москва.
Ова не би било првпат Белорусија да одигра клучна улога во руската агресија. Уште во 2022 година, токму од белоруска територија започна рускиот напад кон Киев, а преку таа рута руските сили напредуваа кон Буча и Ирпин – места поврзани со некои од најтешките воени злосторства во војната.
Во анализата се наведува дека и денес руски ракети и дронови користат белоруски воздушен простор за напади врз западна Украина.
Сепак, авторите посочуваат дека белорускиот претседател Александар Лукашенко е свесен дека директно влегување во војната би било крајно непопуларно дома и би можело дополнително да ја дестабилизира неговата власт.
Дополнителен проблем е што белоруската армија нема сериозно борбено искуство, а голем дел од нејзината најдобра опрема веќе била преземена од Русија за потребите на фронтот во Украина.
„Секоја белоруска инвазија најверојатно би била катастрофална и смртоносна за белоруската армија“, наведува „Киев Индепендент“.
Но, анализата предупредува дека Лукашенко во голема мера зависи од Кремљ за политички опстанок и дека Владимир Путин би можел да изврши доволен притисок за Белорусија директно да се вклучи во војната.
Како можни сценарија се споменуваат нов напад кон Киев или офанзива кон западна Украина со цел пресекување на клучните линии за снабдување од Полска.
Дури и без трајно освојување територија, ваков напад би ја натерал Украина да префрли илјадници војници од источниот фронт, што би ѝ дало предност на Русија во Донбас.
Поради тоа, анализата повикува НАТО и западните партнери на Украина итно да ги засилат разузнавачките активности, да организираат воени вежби во Полска, Литванија и Летонија и да подготват алтернативни линии за снабдување преку Романија.
„По повеќе од четири години војна и со Русија која станува сè поочајна, ништо не може да се исклучи“, заклучува „Киев Индепендент“.
