(Видео) Украина изврши напад врз два танкери што превезувале руска нафта

Украинската служба за безбедност (СБУ) соопшти дека, во координација со украинската морнарица, извела напад врз два руски танкери што се наоѓаат под санкции, користејќи поморски дронови од типот „Мамај“.

Според СБУ, цел на операцијата биле танкерите Louise 1 и Banda, а нападите биле извршени во близина на Новоросијск и Сочи, на руското крајбрежје на Црното Море.

— реклама —

Украинската служба објави видеоснимки на кои, како што тврди, се гледа како повеќе поморски дронови ги погодуваат труповите на двата брода, по што следуваат експлозии. Од СБУ наведуваат дека руската авијација се обидела да ги пресретне дроновите со митралески оган и воздушни бомби, но без успех.

— реклама —

Според украинските власти, танкерот Louise 1, кој е под украински и западни санкции, само во текот на 2026 година превезол речиси три милиони тони руска нафта од типот „Уралс“. Од СБУ наведуваат дека целта на нападите е да се намалат приходите на Москва од извозот на нафта, кои, според нив, се користат за финансирање на војната.

Во соопштението се додава дека Louise 1 учествувал во транспортот на руска сурова нафта и покрај ембаргото воведено од земјите од Г7 и Европската Унија, при што, како што тврдат украинските власти, повремено го исклучувал системот за автоматска идентификација.

— реклама —

За вториот погоден танкер, Banda, СБУ наведува дека превезувал руска сурова нафта од пристаништата Уст-Луга, Керч, Новоросијск и Находка.

Поморскиот дрон „Мамај“ првпат беше претставен кон крајот на 2023 година, а Украина во последните недели значително ги интензивира нападите врз руски пловни објекти во Црното Море.