(Видео) Украина изврши ноќен напад врз Крим, делови од полуостровот останаа без струја

Во текот на ноќта Украина изврши напад врз повеќе трафостаници на окупираниот Крим, по што голем дел од полуостровот останал без електрична енергија, јавуваат руски и украински канали на социјалните мрежи.

— реклама —

Според информациите, цел на нападот биле трафостаниците „Бахчисарај“ и „Зимино“. Прорускиот канал Exilenova Plus соопшти дека тие биле погодени во ноќните напади, додека проукраинскиот канал „Кримски ветер“ објави дека на повеќе локации на Крим дошло до прекини во снабдувањето со електрична енергија поради оштетувања на енергетската инфраструктура.

Нападите следуваат само неколку дена по акцијата на украинската Служба за безбедност (СБУ), која на 3 јули соопшти дека извела удари врз две руски воени воздухопловни бази на окупираниот Крим.

— реклама —

Според СБУ, во нападот врз воздухопловната база Саки, втор во рок од една седмица, биле погодени седум хангари во кои биле сместени борбени авиони „Су-30СМ“, „Су-30“ и бомбардери „Су-24“. Украинските власти тврдат дека најмалку седум летала биле уништени или оштетени.

— реклама —

Командантот на украинските Сили за беспилотни системи, Роберт Бровди, познат по прекарот „Маџар“, претходно соопшти дека во текот на 48-часовна операција, спроведена на 1 и 2 јули, биле нападнати 12 трафостаници и една гасна дистрибутивна станица на територии под руска окупација.

Киев смета дека ваквите енергетски објекти претставуваат легитимни воени цели бидејќи, според украинските власти, тие ја поддржуваат руската воена инфраструктура и операциите против Украина.