(Видео) Украина нападна нафтени објекти на Крим и во Краснодар, има загинати

Најмалку четири лица загинаа, а 28 се повредени во украински напад со беспилотни летала врз Крим, кој е под руска контрола, соопштија локалните власти. По нападот, властите ја прекинаа дистрибуцијата на гориво на бензинските станици низ полуостровот.

Гувернерот на Крим, Сергеј Аксјонов, информираше дека од денес во 9 часот по локално време е запрена продажбата на гориво, како за готовински така и за безготовински плаќања, вклучително и преку ваучери за физички и правни лица.

— реклама —

„Горивото ќе биде достапно само за јавните служби што обезбедуваат витално функционирање и безбедност на Република Крим“, изјави Аксјонов.

— реклама —

Во меѓувреме, локалните власти во руската Краснодарска област соопштија дека во одвоен украински напад со дрон загинало едно лице на патнички траект, додека нафтен терминал бил зафатен од пожар. Поради безбедносни причини, привремено е прекинат и траектниот сообраќај преку Керчкиот теснец, кој го поврзува Крим со Краснодарската област.

— реклама —

Украинскиот претседател Володимир Зеленски изјави дека украинските сили погодиле складиште за нафта во Керч, на Крим, како и постројка за транспорт на нафта во Краснодарската област.

Украинската армија речиси секоја недела изведува напади врз руски рафинерии, нафтоводи и складишта за нафта, со цел да ги намали приходите на Москва од продажбата на енергенси.