Украинските воздухопловни сили предупредија дека постои голема веројатност Русија во следните 24 часа да лансира балистичка ракета со среден дострел од полигонот Капустин Јар, локација од која претходно беше истрелана и ракетата „Орешник“.
„Постои голема веројатност непријателот во следните 24 часа да употреби балистичка ракета со среден дострел, лансирана од полигонот Капустин Јар“, соопштија украинските воздухопловни сили.
Поради заканата од можен ракетен напад, синоќа низ цела Украина беше прогласена воздушна тревога. Украинските канали што ги следат воените активности известија за потенцијална опасност поврзана токму со употребата на балистичка ракета од овој тип.
Русија веќе ја употреби ракетата „Орешник“ во големиот комбиниран напад врз Украина меѓу 23 и 24 мај, кога, според Киев, беа истрелани 90 ракети и 600 дронови од различни типови.
Рускиот претседател Владимир Путин неодамна изјави дека „Орешник“ била употребена со цел да се следи однесувањето на проектилот по лансирањето и да се соберат податоци за евентуално негово целосно воведување во оперативна употреба.
„Орешник“ е руска експериментална балистичка ракета со среден дострел, чиј максимален дострел, според проценките на Пентагон и независни воени аналитичари, изнесува меѓу 3.000 и 5.500 километри. Станува збор за мобилен ракетен систем на цврсто гориво, развиен врз основа на претходни руски дизајни на интерконтинентални ракети.
Нејзина клучна карактеристика е технологијата на повеќекратни независно насочени боеви глави (MIRV), што овозможува во завршната фаза од летот да ослободи повеќе проектили што се движат со хиперсонични брзини, што значително го отежнува нивното пресретнување од постојните системи за противвоздушна одбрана.
