Украинскиот претседател Володимир Зеленски потврди дека новата украинска тактичка балистичка ракета FP-7 првпат била употребена во борбена операција против Русија. Киев, сепак, не открива која била целта на нападот ниту што било погодено.
„Украинска тактичка балистичка ракета. FP-7. Прва борбена употреба. Ви благодарам за резултатот. Следен чекор: сериско производство. Слава на Украина!“, порача Зеленски, објавувајќи видео од лансирањето.
На прашањето на новинарите за целта на ракетата и причинетата штета, советникот за комуникации на украинскиот претседател за „Kyiv Independent“ кратко одговорил: „Тоа не го кажуваме“.
Ракетата FP-7 ја разви и ја произведува украинската одбранбена компанија „Fire Point“. Според објавените технички податоци, ракетата може да достигне максимална брзина од 1.500 метри во секунда, има деклариран дострел до 250 километри и носи боева глава со маса до 200 килограми. Компанијата ги произведува клучните делови на системот, вклучително и ракетниот мотор и системот за наведување.
Развојот на FP-7 и верзијата со поголем дострел FP-9 официјално беше најавен во септември 2025 година, додека првите тестирања беа извршени во февруари 2026 година. Проектилот се темели на советскиот пресретнувач 48N6, кој се користи во противвоздушните системи С-300 и С-400, но користи современи компоненти и понови производствени технологии.
Коосновачот и главен конструктор на „Fire Point“, Денис Штилерман, претходно ја опиша FP-7 како украински пандан на американскиот систем ATACMS, наведувајќи дека би можела да има и поголема боева глава, а да чини значително помалку. Тој нагласил дека сериското производство е клучно за системот да има поширока примена.
Според воениот аналитичар од Украинскиот центар за безбедност и соработка, Назар Барчук, FP-7 е наменета за цели на линијата на фронтот и во непосредната заднина. Меѓу целите што ги навел се командни места, штабови, складишта за оружје и муниција, радарски станици, системи за електронско војување, противвоздушни и ракетни лансери, полигони за лансирање дронови, како и воена инфраструктура и аеродроми во дострелот на ракетата.
Извршната директорка на „Fire Point“, Ирина Терех, на 10 септември на безбедносна конференција во Полска најавила дека ракетата ќе влезе во оперативна употреба „за неколку недели“, откако поминала околу 15 пробни лансирања и финална сертификација во украинското Министерство за одбрана.
Компанијата „Fire Point“ е основана во 2022 година и за кратко време стана еден од позначајните домашни производители на оружје за украинската војска. Компанијата разви повеќе видови беспилотни летала со голем дострел и тешката крстосувачка ракета FP-5 „Flamingo“. Нејзиниот брз развој, сепак, беше проследен со прашања поврзани со сопственичката структура и обвинувања за корупција.
Покрај офанзивните системи, „Fire Point“ го предводи и европскиот одбранбен проект FREYA, започнат во јули со девет европски партнери. Во рамки на проектот се развива FP-7.X, побрза верзија на ракетата наменета за пресретнување балистички ракети.
Компанијата веќе склучила договори со 13 европски воени компании за набавка на радари и глави за самонаведување, со цел цената на еден пресретнувач да биде под еден милион евра. Првото оперативно пресретнување е планирано за средината на 2027 година.
Украина паралелно развива сопствени ракетни и противвоздушни системи поради недостигот на западни противвоздушни средства. Иако Киев претходно добил ветување за лиценца за домашно производство на ракети за системот „Patriot“, американската администрација ја стопирала постапката поради безбедносни причини, додека најновите воени пакети од Вашингтон не го покриваат недостигот од скапите пресретнувачи.
