(Видео) Украина со нов удар врз руската авијација: Погодени базите Саки и Гвардејск на Крим

Украинската служба за безбедност (СБУ) соопшти дека со беспилотни летала извела напад врз руските воени воздухопловни бази Саки и Гвардејск на окупираниот Крим, при што, според нивните тврдења, биле оштетени или уништени најмалку седум руски воени авиони, а погодени биле и хангари за складирање дронови.

Според соопштението на СБУ, нападот е дел од 40-дневната кампања одобрена од украинскиот претседател Володимир Зеленски, чија цел е засилување на притисокот врз руската воена инфраструктура.

— реклама —

Украинската служба наведува дека во воздухопловната база Саки биле погодени седум хангари во кои наводно се наоѓале борбени авиони од типовите „Сухој Су-30СМ“, „Сухој Су-30“ и „Сухој Су-24“. Според првичните информации, најмалку седум авиони се уништени или оштетени.

— реклама —

Истовремено, пријавени се напади и врз два хангара во базата Гвардејск, каде што, според СБУ, биле складирани дронови „Шахед“ и друга воздухопловна опрема. Од украинската служба наведуваат дека овие две бази се меѓу клучните руски воени објекти на Крим и редовно се користат за ракетни и бомбардерски напади врз Украина.

„СБУ продолжува систематски да го намалува рускиот воен потенцијал. Секоја успешна операција значи помалку непријателски авиони, логистички центри, складишта и инфраструктура што ја поддржува руската агресија“, се наведува во соопштението.

— реклама —

Ова е втор напад врз базата Саки во текот на неделава. Претходно, според СБУ, биле погодени пет хангари, а во еден од нив избувнал пожар каде што наводно бил сместен авион „Су-30СМ“. Украинската страна проценува дека вредноста на секој од овие авиони изнесува меѓу 30 и 50 милиони долари.

Руските власти засега не се огласија за нападите ниту ги потврдија информациите на украинската страна. Во меѓувреме, руски медиуми објавија дека неодамна на Крим биле одржани воени вежби со сценарио за можна украинска операција за повторно преземање на полуостровот.