(Видео) Украина тврди дека погодила 21 руски танкер во Азовското Море

Украинските одбранбени сили соопштија дека во ноќта меѓу 10 и 11 јули извршиле напад врз руски пловила во Азовското Море, при што, според нивните тврдења, бил погоден 21 руски танкер.

Од Генералштабот на украинската армија соопштија дека танкерите се користеле за превоз на нафта и нафтени деривати со цел заобиколување на меѓународните санкции и обезбедување приходи за финансирање на руската воена агресија врз Украина.

— реклама —

Според украинската страна, во нападот биле погодени и четири влечни брода, два товарни брода за сув товар и еден багер-брод. Тие, како што наведуваат, биле користени за воена логистика, транспорт на товар и одржување на пристанишната инфраструктура.

— реклама —

Засега нема официјални информации за обемот на штетата.

— реклама —

Командантот на украинските сили за беспилотни системи, Роберт „Маѓар“ Бровди, подоцна изјави дека во нападот биле погодени вкупно 28 руски пловила.

Претходно, аналитичарите од групата „CyberBoroshno“, кои се занимаваат со анализа на јавно достапни информации, објавија дека во нападите биле погодени пловила од таканаречената „флота во сенка“, како и пристаништа и една руска нафтена рафинерија.

Според украинските извори, по нападот врз руските пловила, Русија привремено го запрела сообраќајот низ каналот Дон–Азов, кој ја поврзува реката Дон со Азовското Море. Руските власти засега не ги потврдија овие информации.