(Видео) Украина тврди дека погодила уште 12 руски танкери во Азовското Море

Украинската армија соопшти дека во текот на ноќта со беспилотни летала погодила уште 12 руски танкери во Азовското Море, во рамки на кампањата насочена кон нарушување на снабдувањето со гориво на руските сили и дополнително изолирање на анектираниот Крим.

Генералштабот на Украина преку Телеграм информираше дека нападнатите танкери биле користени за снабдување на руската армија со гориво, како и за транспорт на нафта и нафтени деривати со заобиколување на меѓународните санкции. Во нападите, според украинските власти, биле погодени и еден влекач и еден товарен брод.

— реклама —

Според Министерството за одбрана на Украина, во изминатите четири дена во Азовското и Црното Море биле нападнати вкупно 36 пловила, меѓу кои 32 танкери од таканаречената руска „флота во сенка“ и два товарни брода.

— реклама —

„Сите се обидувале да пренесат гориво кон Крим“, соопшти украинското Министерство за одбрана.

— реклама —

Претходно денеска, гувернерот на руската Ростовска област соопшти дека два танкери во Азовското Море биле цел на украински напади со дронови, но Москва засега не објави дополнителни информации за наводите на Киев.

Во последните недели Украина ги интензивира нападите врз логистичката и енергетската инфраструктура на Крим, што, според украинската страна, довело до недостиг на гориво и до прогласување вонредна состојба на полуостровот, кој претставува клучен логистички центар за руските воени операции.

Командантот на украинските сили за беспилотни системи, Роберт Бровди, минатиот месец изјави дека долгорочната цел на ваквата кампања е практично да се прекине копнената и логистичката поврзаност меѓу Русија и Крим.