Украински дронови погодиле повеќе од 50 руски воени возила во близина на селото Малинивка во Доњецката област, тврдат украински извори, оценувајќи го нападот како еден од најголемите удари врз руската логистика во последните месеци.
Според украинската група „Иван Франко“, која дејствува во состав на Службата за безбедност на Украина (СБУ), колона составена од камиони, комбиња, теренски возила, автомобили и мотоцикли била откриена и нападната со FPV дронови во близина на Малинивка, важна руска позиција во Доњецката област.
На снимките објавени на социјалните мрежи, за кои нема независна потврда, се гледаат десетици оштетени и уништени возила. Групата „Иван Франко“ соопшти дека во нападот биле погодени повеќе од 50 возила.
Засега нема официјални информации за бројот на загинати или повредени руски војници, а руската страна не ги коментираше овие тврдења.
Според анализата на новинарот Дејвид Екс од „Јуромајдан прес“, останува нејасно зошто руските сили формирале голема колона во област што, според украинските извори, долго време е под постојан надзор на украински беспилотни летала.
Во анализата се наведува дека колоната можеби се движела кон Торецк или Костјантиновка, каде што руските сили се обидуваат да ја пробијат украинската одбрана, или, пак, превезувала пешадиски единици поблиску до линијата на фронтот.
Украинските сили во последните месеци интензивно ги напаѓаат руските линии за снабдување, вклучувајќи камиони, железничка инфраструктура, мостови и транспортни рути. Во исто време, украинската армија сè повеќе користи FPV дронови и други беспилотни летала со поголем дострел.
Тврдењата за уништените возила и размерите на нападот не можат независно да се потврдат.
