(Видео) Украина тврди дека уништила руски стратешки бомбардер Ту-95

Украинските одбранбени сили уништија руски стратешки бомбардер Ту-95 на воениот аеродром Енгелс, на реката Волга во централна Русија, околу 800 километри од руско-украинската граница, соопшти украинскиот претседател Володимир Зеленски.

„Силите на Службата за безбедност на Украина (СБУ) го уништија воениот авион Ту-95 во Енгелс, кој се користеше за руските ракетни напади врз нашата земја“, изјави Зеленски.

— реклама —

Тој додаде дека украинските сили извршиле напади и врз објекти на руската нафтена индустрија, како и врз одредени цели на териториите под руска окупација, оценувајќи дека со тоа се зголемува цената на руската агресија.

— реклама —

Од СБУ соопштија дека, според првичните информации, авионот претрпел критични оштетувања, меѓу кои и целосно одвојување на задниот дел од леталото.

— реклама —

„СБУ систематски ги уништува важните елементи на руската воена машинерија. Секој уништен стратешки бомбардер значи десетици неиспукани ракети кон украинските градови, спасени човечки животи и десетици милиони долари непоправлива штета за непријателот“, се наведува во соопштението.

Рускиот стратешки бомбардер Ту-95 се користи за лансирање крстосувачки ракети во нападите врз цели во Украина.

Руските власти засега не ги потврдија тврдењата на Украина.