(Видео) Украинците ја искористија руската тактика против нив: Напад преку подземен гасовод

Украинските сили изведоа необична воена операција во близина на Купјанск, во Харковската област, користејќи подземни гасоводни цевки за да се инфилтрираат на руските позиции. Според првичните податоци што ги соопшти Киев, во акцијата биле елиминирани повеќе од 100 руски војници, а над 30 биле заробени.

Украинските војници поминале повеќе од 15 километри низ подземната гасоводна инфраструктура, под линијата на фронтот во североисточниот дел на Украина. Операцијата, со кодно име „Велес“, била изведена со учество на Вториот корпус на Националната гарда „Хартија“ и други украински единици.

— реклама —

Претседателот на Украина, Володимир Зеленски, соопшти дека напредувањето низ подземниот премин надминало 15 километри. Еден од гасоводите имал пречник од само 1,2 метри, поради што војниците морале да се движат низ исклучително тесен простор.

Подготовките за операцијата траеле подолго време и вклучувале обука за борба во ограничен простор, како и развој на посебни технолошки решенија за навигација, комуникација и одржување на животот на војниците под земја.

— реклама —

— реклама —

Интересно е што слична тактика претходно користела и руската војска. Во септември 2025 година, украинската група за следење на состојбата на фронтот „DeepState“ објави дека руските сили се движеле низ гасовод под реката Оскил, со цел да се инфилтрираат на украинските позиции во близина на Купјанск.

Сега украинските сили примениле сличен пристап против противникот, но, според Зеленски, го унапредиле со посовремени технолошки решенија. Вториот корпус „Хартија“ првпат објави детали за операцијата на 22 октомври, наведувајќи дека со неа биле попречени обидите на руските сили за инфилтрација во областа.

Украинската операција вклучувала и напади на површината, како и координирани удари со беспилотни летала, со цел да се спречат руските војници повторно да ја користат мрежата на гасоводи за продирање зад украинските одбранбени линии.

Купјанск е стратешки важен град во североисточна Украина и веќе подолго време претставува едно од главните жаришта на руските офанзивни активности.