Украинските вооружени сили соопштија дека денеска извеле координирани напади врз руски воен аеродром на окупираниот Крим, два стратешки моста во Доњецката област и три складишта со муниција на териториите под руска контрола.
Според Генералштабот на украинската армија, цел на нападите бил воениот аеродром „Гвардиско“, кој се смета за една од главните бази на руската тактичка авијација на Крим. Оттаму, како што наведуваат украинските власти, се извршуваат борбени летови, логистичка поддршка и одржување на воздухопловната техника. Размерите на причинетата штета сè уште се утврдуваат.
Во истата операција биле погодени и два важни патни моста во источниот дел на Доњецката област, кои, според Киев, руските сили редовно ги користат за транспорт на војници, оружје, муниција и друга воена опрема кон линијата на фронтот.
Украинската војска соопшти и дека нападнала три руски складишта со муниција во близина на Макиивка во Доњецката област, Довжанск во Луганската област и Преображенка во Херсонската област.
Нападот врз аеродромот „Гвардиско“ следува по серијата украински операции насочени кон руските воздушни капацитети на окупираните територии. Украинската служба за безбедност (СБУ) претходно соопшти дека нејзините беспилотни летала ги нападнале аеродромите „Саки“ и „Гвардиско“ на Крим, во рамки на кампања одобрена од претседателот Володимир Зеленски за зголемување на притисокот врз Русија.
Според СБУ, во претходните напади биле погодени повеќе хангари, а уништени или оштетени најмалку седум руски воени авиони, меѓу кои и модели „Су-30СМ“, „Су-30“ и „Су-24“. Дополнително, украинската воена разузнавачка служба (ХУР) објави дека кон крајот на јуни со дрон бил погоден и аеродромот „Белбек“ на Крим, при што, според нивните тврдења, бил уништен еден борбен авион „МиГ-29“.
