(Видео) Украински дронови погодиле нафтен терминал во Новоросијск

Украинските сили извршиле нов напад со беспилотни летала длабоко на руска територија, при што бил погоден нафтен терминал во Новоросијск, на југот на Русија. По нападот на терминалот избувнал пожар, објавија канали кои ги следат воените активности.

Независниот руски канал „Астра“ објави дека во нападот била оштетена и станбена зграда во градот, повикувајќи се на снимки направени од очевидци.

— реклама —

Градоначалникот на Новоросијск, Андреј Кравченко, потврдил дека градот бил цел на украински напад со дронови. Според него, остатоци од соборените беспилотни летала паднале на „подрачје на компанија“, како и во близина на станбена зграда.

Властите на Краснодарскиот крај, каде што се наоѓа Новоросијск, соопштија преку „Телеграм“ дека по нападот избувнал пожар, но не прецизираа на кои локации.

— реклама —

Новоросијск често е цел на украински напади со беспилотни летала. Градот е значаен извозен центар за руската нафта и нафтените деривати, но и за жито и други стоки.

— реклама —

Украина редовно извршува напади врз воена инфраструктура на руската територија и во окупираните подрачја, со цел да ги намали капацитетите на Москва за продолжување на војната.

Во исто време, Русија продолжува со воздушни напади врз украинските градови. Во големиот напад со ракети и беспилотни летала врз Киев во ноќта меѓу понеделникот и вторникот загинале најмалку пет лица, а 35 биле повредени.

Руските напади предизвикале и големи пожари на повеќе места во Киев, поради што делови од градот биле прекриени со густ чад.