(Видео) Украински дронови погодиле руска рафинерија на 700 километри од границата

Украинскиот претседател Володимир Зеленски потврди дека украинските сили употребиле дронови со долг дострел за напад врз руска рафинерија за нафта, сместена околу 700 километри од украинската граница, во текот на ноќта меѓу 21 и 22 мај.

— реклама —

„Продолжуваме со нашите одбранбени операции во одредени зони на активни дејствија. Денеска врховниот командант на вооружените сили на Украина, Олександр Сирски, поднесе извештај за употребата на дронови со долг дострел против руски објекти за рафинирање и извоз на нафта. Конкретно, во текот на ноќта одбранбените сили на Украина дејствуваа против цели поврзани со рафинеријата во Јарослав – околу 700 километри од нашата територија. Војната ја враќаме дома – во Русија – и тоа е единствено праведно“, напиша Зеленски на социјалната мрежа Икс.

Тој додаде дека украинските сили извеле удари и врз одредени цели на привремено окупираните украински територии под руска контрола.

— реклама —

Зеленски најави и подготовки за нови украински напади со среден и долг дострел како одговор на руските напади врз Украина.

— реклама —

Во текот на ноќта меѓу 21 и 22 мај во Јарославска област било издадено предупредување за опасност од дронови, а властите привремено го прекинале сообраќајот на автопатот што води кон Москва. На социјалните мрежи се појавија и видеоснимки со звуци од експлозии.

Зеленски на 19 мај соопшти дека одобрил планови за долгорочни напади врз руска територија во текот на јуни.