Украински беспилотни летала рано утринава извршија нов масовен напад врз Москва, предизвикувајќи пожари и прекини во воздушниот сообраќај, додека руските власти тврдат дека противвоздушната одбрана пресретнала десетици дронови насочени кон главниот град.
Според градоначалникот на Москва, Сергеј Собјанин, руската противвоздушна одбрана уништила 33 беспилотни летала кои се движеле кон градот. Тој наведе дека е регистрирана помала материјална штета на објект во рамките на трговскиот центар „Садовод“, а засега нема информации за загинати или повредени лица.
Во нападот повторно била погодена московската нафтена рафинерија, вторпат во последните три дена, при што избувнал голем пожар во индустрискиот комплекс. Поради безбедносни причини, привремено биле воведени ограничувања на летовите на аеродромите Внуково, Шереметјево и Жуковски.
На социјалните мрежи се појавија бројни снимки и фотографии на кои се гледаат пожари и експлозии на повеќе локации низ Москва. Дел од видеата прикажуваат пламен во станбени објекти и во близина на рафинеријата, но нивната автентичност не е независно потврдена.
Истовремено, украински дронови нападнале и цели во Ростовската област. Во градот Гуково избувнал голем пожар, а локалните жители тврдат дека е погодено складиште за нафта. Гувернерот на регионот, Јуриј Сљусар, потврди дека едно лице загинало, а две се повредени и се пренесени во болница.
Сљусар соопшти дека биле оштетени локомотива и два комерцијални објекти, без притоа да прецизира за кои објекти станува збор.
Ростовската област има важна улога во руската воена логистика поради близината до фронтот во Украина, поради што нафтената и транспортната инфраструктура често е цел на украински напади.
Според руски индустриски извори, претходниот напад врз московската рафинерија целосно ја запрел работата на постројката. Во последните месеци Украина значително ги интензивираше нападите со беспилотни летала врз воени, енергетски и индустриски цели длабоко во руската територија.
И покрај засилените безбедносни мерки и поставувањето современи системи за противвоздушна одбрана на повеќе објекти во Москва, украинските дронови повторно успеаја да стигнат до руската престолнина и да погодат стратешки цели.
