Жителите на кримскиот град Масандра, кои поради прекините во снабдувањето со електрична енергија останаа без можност да готват во своите домови, чекаат во редици за топол оброк што се подготвува на улица, објави Ројтерс.
Во повеќе градови на Крим, полуостровот што Русија го анектираше во 2014 година, во текот на летото има проблеми со снабдувањето со електрична енергија по украинските напади врз електрани и друга инфраструктура.
Началничката на градската управа на Масандра, Оксана Маџуд, изјави дека секојдневно се обезбедуваат околу 200 топли оброци за жителите. На менито има хељда со загреано конзервирано говедско месо.
„Подготвуваме топли оброци бидејќи во сегашните услови не сите имаат можност да готват на електрични шпорети“, изјави таа.
Жителката Марина раскажа дека поради болка во ногата тешко се симнува од својот стан на десеттиот кат, но прекинот на струјата ја принудил да побара плинско решо.
Друга жителка, Александра, изјавила дека по десет дена без електрична енергија, струјата повторно била вклучена, но не е сигурна дали снабдувањето ќе остане стабилно.
Украина соопштува дека со нападите врз цели на руска територија и на подрачјата под контрола на Москва одговара на руските напади врз украинските градови, кои траат од почетокот на инвазијата во 2022 година.
