(Видео) Украинските сили ја нападнаа рафинеријата на „Лукоил“ во Перм

Украинскиот Генералштаб соопшти дека украинските сили извршиле напад врз нафтената рафинерија „Лукоил-Пермнефтеоргсинтез“ во рускиот град Перм, една од најзначајните постројки на компанијата „Лукоил“. Рафинеријата годишно преработува повеќе од 13 милиони тони сурова нафта и произведува бензин, дизел, авионско гориво и мазива.

На социјалните мрежи во Русија вчера беа објавени фотографии и видеа за кои се тврди дека го прикажуваат нападот. Гувернерот на Пермскиот регион, Дмитриј Махонин, потврди дека бил погоден индустриски објект, додавајќи дека дел од дроновите биле пресретнати и дека нема повредени лица.

— реклама —

Нападот го потврди и украинскиот претседател Володимир Зеленски, кој изјави дека Украина спровела „санкции со долг дострел“ во Пермскиот регион, без притоа да ја именува целта. Подоцна, украинската Служба за безбедност (СБУ) соопшти дека мета била токму рафинеријата „Лукоил-Пермнефтеоргсинтез“, која се наоѓа на повеќе од 1.500 километри од украинската граница.

— реклама —

Според украинскиот Генералштаб, по нападот избувнал пожар во кругот на рафинеријата. Првичните информации укажуваат дека огнот зафатил постројка за примарна преработка на нафта, која претставува еден од клучните делови на комплексот.

Украина наведува дека овој напад е дел од пошироката кампања на удари со долг дострел насочени кон руската нафтена индустрија, со цел да се наруши снабдувањето со гориво и да се ослабат капацитетите на Москва за продолжување на војната.

— реклама —

Според украинските власти, досегашните напади врз цели во Русија и на окупираните територии, вклучително и Крим, во одредени региони предизвикале недостиг на гориво, при што медиумите известуваат за празни бензински пумпи и долги редици возила.

Зеленски потсети дека на 26 јули одржал состанок со воениот врв, на кој била анализирана кампањата на далекуметни удари. Тој истакна дека од почетокот на годинава украинските сили извеле повеќе од 1.000 такви операции.

„Нашата цел е со притисокот од долг дострел дополнително да ја поттикнеме Русија кон дипломатија. Тоа го правиме преку нарушување на производството на компоненти за оружје, нанесување штети на нафтениот и други економски сектори и враќање на војната таму од каде што започна“, порача Зеленски.